20年新聞大事回顧

回歸後首日交易可看漲 聯局議息前夕美股造好

1997-07-03
今日是香港回歸中國後第一個股市交易日,表現舉世矚目,恆生指數的政經前景的指標,投資者無睇香港前景,多少可以從股價反映,基於呢個因素,唔少人都預期中資會托市,為特區政府營造良好氣氛。

陸文豪個人覺得,若聯儲局唔加息,恆指在七月上旬可以升上一萬六千點創新高,之後仍會反覆再上。

在聯儲局議息前夕,美國公布新屋動工及全國經理人採購指收,表現均比市場估計低,七月份的理事會議,唔加息機會大於一切,周二美國長債孳息回落,美股造好,已預先反映呢個因素。

回歸後, 個人感覺與以前冇乜唔同,只不過米字旗除下,換上五星旗,但愿香港成為特別行政區之後,真真正正能夠落實一國兩制、港人治港,如此香港必能繼續繁榮昌盛,若然香港回歸中國換咗面旗就乜都唔變,則恆生指數追上日經平均指數又有何難哉!

特區政府成立後第一要事,就係壓抑已脫軌嘅樓價,董特首在就職聲明中特別提到住屋問題,開出期票,話要在十年後令七成港人有自置物業,申請公屋三年上樓,每年房屋單位供應量八萬五千個,比煲呔曾每年增加八萬個單位承諾還要多。

董特首嘅板斧係增加土地供應,且一反香港地少人多的講法,話香港工地十分足夠,要致力改善基建,大量移山填海,就可以增加土地供應。

另外,董特首話特區政府有短期措施壓抑炒風,必要時會採取果斷行動。暗示近日廣泛流傳的徵收樓宇轉讓稅暫時唔會實施,除非樓市再癲。

雖然如此,炒家唔駛開心,特區政府傳達的信息相當明確,高地價政策已改變,日後唔容許樓價大升,只能平穩發展,開出每年八萬五千個單位的期票,就此想扭轉市民對樓價會無休止上升的預期心態。

地產股在六月份一直都受到特區政府樓價政策不明朗因素影響,股價表現遠遠落後大市,董特首從根本問題解決樓價高企,對地產股會有一定影響,但唔會造成打擊,地產股會繼續落後大市,大跌機會唔大。

未來半年,洋行股應該可以睇番好些少,和黃在年初重組後獲得一筆可觀特殊收益,彌補售樓收益大幅減少的真空,明年和黃有樓賣,盈利可以持續增長,股價落後好多,應可追番上。不得不再提下,就在今年香港回歸大典,出席盛會的中央領導人都下榻和黃間紅磡海逸酒店,可見超人李分量重點,七一回歸後,長實和黃仍有大把世界。

紅籌股在回歸後必然會再上一層樓,但是中國頒布紅籌注資及分拆指引,會對若干省市窗口公司有影響,強如北京控股最近亦越炒越縮,反而母公司有雄厚背景的華潤創業、光大明輝及招商局國際就越升越有,呢幾隻紅籌,值得長線持有。

國企股亦有重視價值,九月份中共召開十五大,為跨世紀領導班子作出安排,國企改革亦是重頭戲,目前中國被國企拖累,唔少國企管理不善,連年虧蝕,需國家大量補貼先至能夠生存,但長此下去會食窮國庫,將虧蝕國企關門,又會引起失業問題,對穩定不利,因此要為國企做一次大手朮,扭轉經營劣勢,上海海興輪船母公司改組就是國企改革的產物,呢類國企有重視價值。

長假期間,大摩策略家巴頓碧斯大幅增持現金,即見到美股樂觀指數升到百分之八十,恐大調整隨時出現,於是建議客戶減持股票增持現金。